කොරෝනා වෛරසය ආසාදිත රෝගීන් බවට සැකපිට පුද්ගලයින් සිව්දෙනකු මහනුවර ජාතික රෝහලට ඇතුළත් කර ඇතැයි කොරෝනා මර්දන හා කළමණාකරණ කමිටුව සඳහන් කරයි.
මෙම රෝගින් අද (17 ) දිනයේ දි රෝහලට ඇතුළත් කර ඇති අතර ඔවුහු මුරුතලාව, හෙම්මාතගම, මහයියාව සහ අකුරණ වැලිකැටියේ පදිංචිකරුවන් බවද වාර්තා වේ. වයස අවුරුදු අසූ තුන , විසිදෙක , හතලිස් එක සහ හතලිස් හය යන වයස්වල පසුවූ මෙම පුද්ගලයින් සම්බන්ධයෙන් සියලු පරික්ෂණ මේ වන විට පවත්වන බව ද එම කමිටුව වැඩිදුරටත් ප්‍රකාශ කරයි.
කොවිඩ් – 19 හෙවත් කොරෝනා බවට තහවුරු වූ පළමු ව හදුනා ගත් රෝගීන් ඇසුරු කළ පුද්ගලයින් සම්බන්ධයෙන් තවදුරටත් පොලිසිය හා ත්‍රිවිධ හමුදාව එක්ව පරික්ෂණ පවත්වන බවත් බුද්ධි තොරතුරු ඒකකය මගින් වෙනමම පරික්ෂණ පවත්වන බවත් , ඊට අයත් බවට සැකසහිත රෝග ලක්ෂණ ඇති පුද්ගලයින් වහාම මහනුවර ජාතික රෝහලට ඇතුළත් කිරිමට කටයුතු යොදා ඇති බවත් මධ්‍යම පළාත් ජ්‍යේෂ්ඨ නියෝජ්‍ය පොලිස්පති රොෂාන් ප්‍රනාන්දු මහතා පවසයි.
